Walgahii ADO – Alberta, Canada

Posted by ODF on Wednesday, September 4, 2013 · Leave a Comment 

Addi Demokiratawaa Oromoo/ADOn  ummanni Oromoo baroota dheeraaf mirga humnaan sarbame deeffatee, biyya isaa irratti abbaa, qabeenya isaa irratti abboomaa  ta’ee akka jiraatuuf qabsoo inni gaggeessaa turee fi jiru akka fiixa ba’uuf gahee isaa gumaachuuf qabsa’a.

Akkuma beekamuu fi irra deddeebi’amee himame dhaloota ADOf kan sababa ta’e, Qabsoo ummanni Oromoo baroota dheeraaf gaggeessaa tureen injifatnoolee argate qabatee garafuulduraatti tarkaanfachuu irra  of duuba deebi’aa deemuu qabsoo  ti. gamabiraan ammoo   mooraa qabsoo bilisummaa Oromoo keessatti waldhabdee fi lolli jiru nagaan furamee, qabsaa’onni Oromoo wal- loluu dhiisanii diina isaanii qofa irratti akka bobba’aniif yaaliin baroota dheeraaf ta’aa ture fachaluu isaa, ABO tokkorraa gara 4ykn shanitti adda baba’uun isaa fi haalleen kanaan wal qabatan baayyeetu bu’ureeffama ADOf sababa ta’e.

Egaa ADOn osoo gara dhaabaatti  hin jijjiiramin dura yeroo akka Waltajjii Mariitti socho’aa turetti dursa hojii taasfatee kan inni sossa’aa ture, deemsa qabsoo bilisummaa Oromoo kaleessaa, har’aa fi deemsa isaa borii irratti hawaasa oromoo gidduutti wal hubannaan akka jiraatuuf jabinaan irratti hojjechaa ture. Erga dhaaba ta’een boodas, maaf dhaaba haaraa ijaaruun akka barbaachisee fi sagantaan isaa fuula duraa maal akka ta’e irratti hawaasa Oromoo biyyoota adda addaa keessa jiraataniif ibsa kennuun maree waliin gaggeessaa ture, jiras.

ADOn walgahii ummataa banaa ta’e gaggeessa waan ta’eef walgahii akkasii irratti kan isa deeggaranis, isa mormanis, gaaffii adda addaa qabanis, hunduu walgahii kana irratti argamuun Hoggantoota dhaabichaa waliin akka yaada wal jijjiiraniif hawaasa oromoo hunda afeera. Kunis kan godhamaa ture, yaada qajeelaa fi democratawaa kan ummatni bilisummaan sodaa tokko malee yaada karaa qabsoo saba keenyaaf ta’a jedhu dhiheessee irratti mari’atuun yaada isa wayyaawaa fudhachuu fi isa jibbe ammoo karaa ammayyaan(modern/civilized)dhiisuun gargarbahuu akka danda’amu amanuu irraati.

ADOn deemsa isaa akkasii kana keessatti yeroo baayyee waan arguu fi taajjabau baayyee qaba. Aadaa fokkisaa miseensotni dhaaba an  Oromoofan qabsaa’a ofiin jedhanii  tokko tokko umurii isaanii guutuu qabatanii ittiin jiraachuu barbaadanis kan deebisee isaanuma miidhu malee kan qabsoo saba ni dhaabbanaaf jedhani kanaaf bu’aa hin qabne ta’uu isaallee ni hubata.

ADOn gaafa bu’ureeffamu irraa jalqabee akka dhaaddannootti jiruu isaa guyyuu keessatti qabatee deemu tokko, qabsoo Oromoon walii isaa irratti geggeessu  keessaa baafnee warra isa garboonfatanii jiran waliin goona waan ta’eef atakaaroo dhaabota Oromoo waliin hin seennu kan jedhu ture. Kanaafis hanga har’aatti karaa adda addaan ololaa fi lola ADO irratti deemuuf deebii hin kennin har’a ga’e, fuuldurattis dhaaddannoo fi ejjennaa isaa kanaan itti fufa.

Kana jechuun garuu lafa mirgi isaa xuqamee fi daangaan darbametti of irraa hin ittisu ykn deebisa hin kennu jechuu akka hin taane  hubatamuu qaba.

Walgahii ADOn hawaasa Oromoo waliin gaggeessu bakka tokko tokkotti namoonni tokko tokko dhaabota  Oromoo tokko tokkoon; keessumaa dhaaba ABO  ergamne kan jedhan  walgahii ADO jeequuf ykn gufachiisuuf yeroo isaan ifatti yaalii taasisan mul’achaa jira. ADOn dhaaba Siyaasaa sagantaa mul’ataa fi ifaa qabu waan ta’eef, falmi isaa diinota Oromoo waliin malee dhaabota Oromoo waliin waan hin taaneef dhimma kana osoo arguu irra darbaa ture.

Haata’u garuu namootni an miseensa ABOti ofiin jedhan kan aadaas ta’e naamusa miseensi dhaba sabaguddaan bakka bu’a ofiin jedhuu kan hinqabne fi waangodhan illee kan hinbeekne yeroo isaan jequmsa walgahii hawaasaa irratti godhan argina.  beekaniis haa ta’u osoo hin beekin ergaa diinaa baatanii  akka deemaa jiran himuu feena.  Kun kan agarsiisu  amala diiggaa fi gadhee hoogganni  dhaaba isaan itti miseensoman kun qabu saaxiluu irra darbee deemsa ADO irratti waan inni fidu tokkollee hin jiru.

Warri akka murna kanaa  yoo nu ta’e malee waa  hojjetamu hinqabu kan jedhanii fi biyya Oromaa keessatti illee oromoon nagaan akka hin maria’anne gochuu barbaadan kun osoo silaa danda’ameefii aangoo siyaasaa qabaatanii ykn carraa biyya bulchuu argatanii sirna akkamii uumuuf deemuu kan jedhu namnuu  itti yaaduu qaba.

Hagayya 31 bara 2013 biyya Canada magaalaa Calgary Alberta  walgahii ADOn gaggeessaa ture irrattis waanti ta’es kanuma. ADOn akkuma biyyoota adda addaa keessatti gochaa ture, Hawaasa Oromoo naannoo sana jiruuf walgahii qopheesse. Walgahiin kunis walgahii banaa waan tureef  kan dhaaba kana deeggarus, mormus, gaaffii qabus hundumatu irratti argame.  Walgahiin kunis eebba maanguddoon jalqabee akka xiqqoo tureenis namoonni lakkoobsaan 4 ykn shan ta’anii fi  jeequmsaaf ergamanii dhufan iyyuu jalqaban. Booda yoo gaaffii ykn yaada qabaataniif yeroo isaatti akka dhiheeffatan gaafataman illee didaanii jeequmsa isaanii itti fufuu yaalan. Boodas fedha gaggeessotoota walgahiichaa ala humnaan walgahii sana keessaa salphatanii akka ba’an taasifamee walgahiin itti fufuun akeeka yaamameef guutuun milkiin xumurame. Kanneen jeequmsa kana uumuu yaalanis kiliippii video yeroo wacni ta’u qofa waraabaniin akka waan injifannoo addaa argataniittti yeroo dhiichisuu yaalantu mul’ata.  Garuu hawaasa Oromoo dhimma qabsoo bilisummaa Oromoo irratti mariachuuf  walitti dhufe gidduutti argamnii jeequmsa kaasuu yaaluun kan nama dhugumaan saba hacuuccaa halagaa jala jiruuf  qabsaa’uu nutti hinfakkaatu. Kanaafuu ADOn  biyya seera qabu keessa sosso’a  waan ta’eef lammata haalli akkasii kan uumamu yoo ta’eef callisaan kan irra hin dabarre ta’uu isaa hubachiisa jechuun ergaan gulaalaa imaammata ADO ibsu yaada isaa  gudunfa.